-
@ Esmail EL BoB 🇵🇸
2025-04-07 09:44:30تنبيه مهم
أهلاً! قبل ما نبدأ، أنا مش مستشار مالي ولا خبير حاجة. أنا بس واحد قعد يتابع قنوات ويقرا عن الاستثمار الفترة اللي فاتت. مش مسؤول عن أي خسارة فلوس، بس كل اللي هاقوله هنا أنا بطبقه على نفسي الأول، فطبعاً مش هاضر نفسي (عن قصد على الأقل).
إيه اللي هنتكلم عنه
هاعمل سلسلة بوستات عن: - الأساسيات اللي لازم تعرفها عن الاستثمار والتداول - أفكار تساعدك تعمل محفظة استثمارية كويسة - تجربتي مع تطبيقات الاستثمار المختلفة - إجابة على الأسئلة اللي بتتسأل كتير
هاحدّث البوستات لو في معلومات جديدة وهاكتب تاريخ آخر تحديث. عايز تتواصل معايا؟ اكتب كومنت علي بوست ريديت اللي لاقيت فيه لينك المقالة دي.
الأساسيات
الغلطة الأولى: لازم يكون معاك فلوس كتير علشان تستثمر
دي فكرة غلط خالص. في الحقيقة، إنت بتستثمر علشان تجمع فلوس مش العكس. معظم الطرق اللي هاقولك عليها ممكن تبدأ بمبلغ صغير (حوالي 100 جنيه) وتزود عليه كل شهر. والحلو إن معظم الحاجات دي بتخليك تقدر تسحب فلوسك بسهولة لو احتجت.
أهمية التحويش
علشان تستثمر بجد، لازم تحوّش جزء من مرتبك كل شهر. المفروض تحوّش 25% من مرتبك، بس مع الغلا اللي احنا فيه دلوقتي، ابدأ بأي مبلغ تقدر عليه حتى لو 100 جنيه بس في الشهر. احسب مصاريفك لكام شهر وحط جنب مبلغ يكفيك 3-6 شهور للطوارئ.
طريقة تفكير المستثمر
الناس الناجحة مش بتصرف على المظاهر. قبل ما تشتري أي حاجة، اسأل نفسك: "هاستخدم الحاجة دي بعد 3 شهور؟" حدد احتياجاتك الحقيقية وبعدين دوّر على أحسن حاجة تناسبك. الاستثمار طريقة تفكير قبل ما يكون مجرد حتة تحط فيها فلوسك وخلاص.
بلاش تخلي مشاعرك تتحكم فيك
متخليش قلبك يتحكم في قرارات استثمارك. أكيد السوق ممكن ينزل شوية، بس على المدى البعيد بيطلع تاني. بص مثلاً على مؤشر S&P 500. في مقولة حلوة بتقول: "If in doubt, zoom out".
أهمية توزيع الفلوس
متحطش فلوسك كلها في مكان واحد. لو حطيت كل فلوسك في البورصة وحصل هبوط، هتخسر جامد. لكن لو حاطط جزء في البورصة وجزء في الدهب مثلاً، لما واحدة تنزل التانية ممكن تطلع. اختار استثماراتك على حسب هدفك: عايز تسيب فلوسك لمدة طويلة (دهب وبورصة)؟ ولا عايز دخل شهري (صناديق استثمار أو شهادات بنك)؟
صعب ما هتبقي غني علي المدي القصير
في ناس كتير لما بتسمع كلمة "استثمار" بتتخيل على طول عربيات فيراري وقصور. ولما تقولهم اشتروا دهب بيقولولك "لأ هستنى لما ينزل" (وهو أصلاً بيطلع).
الفكرة إنك متحاولش تحدد "الوقت المثالي للسوق" (Time the market) عشان تدخل، لأنه ببساطة صعب جداً تعرف إمتى الوقت ده. ناس كتير بتحاول تحقق عائد أعلى من المتوسط (اللي هو 10% سنوياً) وبينتهي بيهم الأمر خسرانين.
فمتحاولش تعمل ذكي أوي وتفضل مستني وتأجل. ابدأ على طول، والتزم بالاستثمار بانتظام.
مفيش حاجة كاملة
انا عارف شعور انك عايز كل حاجة وصدقني مش انت لوحدك، بس زي ما بيقولوا بالإنجليزي "you can't have your cake and eat it too"!
يعني مثلاً لو عايز ربح كتير هتلاقي مقابله مخاطرة عالية، أو لو عايز أمان لفلوسك هتلاقي العائد قليل. دايماً هتلاقي حاجة على حساب حاجة وانت بس اللي تقرر هتستحمل إيه.
أنا بالنسبة لي، بفضل حاجة بعائد صغير سنوي بس فيها أمان علشان مع الوقت يحصل تراكم للفوايد (compound interest) ويزيد المبلغ، بدل ما أخش في حاجة وأخسر كل حاجة.
بس زي ما قلت، دي بترجع من شخص لشخص. ممكن مثلاً لو حاسس إن قدامك فرصة حلوة، تجرب بنسبة صغيرة (زي 20% من فلوسك) كتجربة. بس دايماً دايماً دايماً متخليش الطمع يسوقك.
الوقت والعائد
معظم طرق الاستثمار الآمنة بتاخد وقت علشان تظهر نتايجها. زي ما قلت قبل كده: العائد السريع غالباً بيقابله مخاطرة عالية. أنا بقدملك هنا خيارات أكثر أماناً، لكن مقابل ده هتلاقي العائد مش هيبقى مبهر على المدى القصير. عشان كده لازم تفكر في الاستثمار على مدة متوسطة لطويلة (من 3 لـ 5 سنين) علشان تحصد ثمار استثمارك بشكل كويس وتشوف النتايج اللي بتتمناها.
مصادر للتعلم
قنوات يوتيوب
- بالمصري:
- عميد يستثمر
-
محمد محي الدين
-
بالإنجليزي:
- Two Cents
- The Money Guy Show
- Clear Value Tax
- The Plain Bagel
مواقع تفيدك
- بالإنجليزي:
- Investopedia
كمل قراية من هنا: nostr:naddr1qvzqqqr4gupzpu2h0sja0vmqdqjzq6e820jjjnuytzw2ksmemfnadhe0hm0zdws5qqxnzde5xvurqdp4xuunqd3sau2w7y
ادعمني (لو حابب)
- USDT (TRC20):
TKQ3Uwkq21ntiua2Zh9Hu376fdMdnRGWN6
آخر تحديث: 4 أبريل 2025