-
@ Esmail EL BoB 🇵🇸
2025-04-07 07:31:27النهاردة هنتكلم عن شهادات البنك. وقبل ما أكمل، أنا مش شيخ ومش دوري أقولك الحلال والحرام. إنت تقدر تسأل أهل العلم أكتر على حسب دينك طبعاً.
أنا برشح شهادات البنك في حالتين: لو كانت بالدولار (مع إني في الحالة دي هقولك اعملهم عملات رقمية أحسن لأنه هيبقى سهل تحركهم برا البنك وقرفه)، أو شهادات بالجنيه علشان تصرف منهم (بس هنا برضه هقولك شوفلك فوري يومي أحسن شوية).
غير بقى لو إنت عايز الشهادات اللي العائد فيها أعلى، بمعنى حاجة زي 27% سنوي أو ال3 سنين تناقصي (أول سنة 30%، تاني سنة 28%، وتالت سنة 25% تقريباً) وساعتها العائد مش هيبقى شهري. بس لو دي خطتك، فساعتها بس هرشح ليك شهادات البنك. غير كدا مش شايف ليها لازمة، لأنه بكل بساطة عقبال ما الفلوس تتفك هيكون قيمتها قلت والعائد نفسه ملهوش قيمة أوي.
طبعاً هنا مش هقدر أتكلم كتير لأن كل بنك ليه سياسته، بس كل اللي أقدر أرشحه أي حاجة تكون أقرب من بيتك وشهاداتها عالية زي البنك الأهلي المصري أو بنك مصر. والحلو إنك تقدر تعمل شهادة أونلاين عن طريق التطبيق.
وإنت بتفتح حساب، أرشحلك تفتح وقت الشمول المالي لأنه بيبقى سهل، وتفعّل تطبيق البنك وتعمل شهادات براحتك. بس العيوب إنها بتختلف من بنك لبنك، والحساب بيبقى فيه حد أقصى للرصيد لو شمول مالي حوالي 100 ألف أو 200 ألف (مشاكل أغنياء برضه بس حبيت أوضحها). ده غير كل 3 شهور مصاريف الحساب برضه، وطبعاً إنك مش هتقدر تاخد الفلوس غير بعد المدة أو أول 6 شهور بس هتخسر جامد فيهم، فخلي بالك.
مع باقي حاجات البنك المعقدة دي بقى، اسأل البنك. وبرضه حابب أوضح: خلي بالك وإنت بتمضي، لأنه بسمع حالات كتير موظف البنك خلى الناس تمضي على كريدت كارد وتأمين للحياة وغيره كتير. فاقرأ إنه نت بنكي وفتح حساب وخلاص. وللأسف هنا الفرع بيفرق، فاختار الأقرب أو أنضف أقرب حاجة ليك (لو فيه فرع معروف إنه وحش يعني). ولو في أي مشاكل أنصحك تعمل بلاغ في البنك المركزي https://www.cbe.org.eg/ar/consumer-protection علشان تاخد حقك.
المميزات: - سهل نسبياً ومضمون - بطاقة بس لو حساب شمول مالي
العيوب: - مش هتاخد الفلوس غير بعد المدة سواء سنة أو 3 سنين - ممكن البنك يرخم عليك - مصاريف الحساب الدورية (غير لو كان بنك زي QNB مثلاً، بس في الوقت ده الشهادات العائد فيها قليل مقارنة بالباقي ومفيش شهادات بالعملات الأجنبية)
ادعمني (اختياري)
- USDT (TRC20):
TKQ3Uwkq21ntiua2Zh9Hu376fdMdnRGWN6
شوف الكومنتات لو فيه أي تعديل أو بوستات جديدة.
- USDT (TRC20):